Жамбыл Жабаевтың әдеби-мемориалды музейіне Ресей Федерациясының Санкт-Петербург қаласынан сәлемдеме келді. Ақын музейімен ұзақ жыл бойы тығыз байланыста жүрген Санкт-Петербург қаласының тұрғыны Шерхан Әбілов өзінің жеке кітапханасы қорынан бірнеше кітап жіберіпті. РФ Кинематографистер одағының мүшесі, «Ленфильм» киностудиясының әртісі Шерхан Әбдібайұлы сыйға тартқан кітаптармен қоса Жамбыл жайлы жазған мақалаларын да жолдаған.
Шерхан Әбілов – еліміздің оңтүстік өңіріндегі Кентау қаласында туып-өскен қандасымыз. Өзге елде еңбек етіп жүрсе де, оның отандық музей ісінің дамуына қосқан еңбегі зор. Ол Ресей тарапынан Жамбыл Жабаевқа берілген «Личность Петербурга» медалін 2008 жылы елге жіберуге ықпал еткендердің қатарында болған. Сондай-ақ ол – көрші елдің киногерлері түсірген екі фильмде Жамбылдың рөлін сомдаған кәсіби әртіс. Бұл жолы музейге тапсырған кітаптардың ішінде 1949 жылы шыққан «Девятьсот дней» атты кітаптың алғашқы бетінде «Ленинградтық өренім, Мақтанышым сен едің! Нева өзенін сүйкімді, Бұлағымдай көремін» деп басталатын Жамбылдың әйгілі «Ленинградтық өренім» өлеңі басылған.
Ресейден жөнелтілген сәлемдемені Алматыдан Ғалымжан Бегімбетов есімді азамат қабылдап алып, Жамбыл ауылына әкеліп, аманаттап тапсырды. Оны Жамбыл музейінің меңгерушісі Салтанат Тезекбайқызы бастаған музей қызметкерлері құрметпен қабыл алып, алғыс білдірді. Жыр алыбына қатысты жәдігерлер қатары осылайша шетелдің баспа өнімдерімен толыға түсті.
Серік Сатыбалдиев
Жамбыл ауданы
