Кеген ауданы Жылысай ауылдық Мәдениет үйінде қазақ поэзиясының жарық жұлдызы Мұқағали Мақатаевтың туғанына 95 жыл толуына орай «Поэзия – жүрек тілі» атты әдеби кеш өтті.
Аталмыш шараға Кеген аудандық мәслихат төрағасы Алмасбек Нұғыман, аудандық ішкі саясат бөлімінің басшысы Еркінбек Қалқаев, аудандық мәдениет, тілдерді дамыту, дене шынықтыру және спорт бөлімінің басшысы Талғат Әріпжанұлы қатысты.
Әсерлі кештің шымылдығын аудандық мәслихат төрағасы Алмасбек Нөкербанұлы ашып, мұзбалақ ақынның жауһар жырлары туралы тағылымды ой өрбітті. Шарада ақын өмірінен сыр шертетін бейнеүзінді көрсетілді.
Жиын барысында «Жырлайды жүрек, сөйлейді Мұқағали» тақырыбында мекемелер арасындағы жыр-челленджінің үздіктері анықталды. Жылысай ауылдық ардагерлер алқасының төрағасы Болат Таубалдиев бас жүлдеге ие болды. І орын ветеринария бөліміне, ІІ орын емхана ұжымына, ІІІ орын Мәдениет үйі қызметкерлеріне табысталды. Сонымен қатар 9-16 жас аралығындағы оқушылар арасында өткен «Поэзия – жүрек тілі» атты көркемсөз байқауының да жеңімпаздары марапатталды. Қазылар алқасының шешімімен бас жүлдеге Шұғыла Нүсіпәлі лайық деп танылды. І орынды Айнұрым Рауанқызы, ІІ орынды Қасқарбай Ерасыл иеленді, ІІІ орын Ақерке Намазбаеваға бұйырды. Арнайы номинациялар – «Ең әсерлі оқылым» – Ақмаржан Бектұрсыноваға, «Ерекше орындау» Балауса Кәдірбекке табысталса, Нұрайым Тұратбек «Көрермен көзайымы» атанды. Жеңімпаздарға арнайы диплом мен ақшалай сыйлықтар берілді.
Кеште оқушылар ақын өлеңдерін жатқа оқып, тыңдаушыларды тәнті етті. Сондай-ақ өнерлі өрендер «Есіңе мені алғайсың», «Сенің көзің» әндерін әуелете шырқады.
Осылайша, тағылымды шара жастардың әдебиетке деген сүйіспеншілігін арттырып қана қоймай, Мұқағали мұрасының мәңгілік екенін тағы бір дәлелдеді.
Дәурен ӘБУТӘЛІПОВ
Кеген ауданы
