Президент бүгінгі халыққа арнаған Жолдауында АЭС салу немесе салмауды жалпыұлттық референдум арқылы шешкен жөн екенін мәлімдеді.
«Атом электр станциясын салу қажет пе, жоқ па деген сауалға қатысты түрлі пікір бар екенін білесіздер. Қазақстан – әлемдегі ең ірі уран өндіруші мемлекет. Ендеше өз жерімізде атом станциясын салуға әбден қақымыз бар», деді Қасым-Жомарт Кемелұлы.
Күні кеше ғана Жамбыл ауданындағы Үлкен ауылында осыған қатысты жария тыңдау өтті. Бірқатар сарапшылар шағын АЭС салу керектігін алға тартса, тағы бір топ ядролық станцияның қауіпсіздігіне күмәнмен қарады.
«Семей полигоны халқымызға қаншама қасірет әкелгенін ескерсек, олардың күдігін түсінуге болады. Сондықтан бұл мәселе бойынша қоғамдық тыңдауларды, егжей-тегжейлі, кең ауқымды талқылауларды жалғастыруымыз керек. Біз маңызды стратегиялық мәселелерге қатысты түпкі шешімді референдум арқылы қабылдауымыз қажет. Бұл – 2019 жылы сайлау алдында менің халыққа берген уәдем. Атом электр станциясын салу немесе салмау мәселесі – бұл еліміздің болашағына қатысты аса маңызды мәселе. Сондықтан оны жалпыұлттық референдум арқылы шешкен жөн деп санаймын. Нақты мерзімін кейін анықтаймыз», деп нақтылады Президент.
