Райымбек ауданының орталығы – Нарынқолда Алматы облысы мемлекеттік архивінің филиалы ашылды.
Архивтің ашылу салтанатына аудан әкімі Берік Дүйсенбаев, облыстық мемлекеттік архиві бас директорының орынбасары Әйгерім Қырықбай қатысып, жаңа ғимаратқа көшкен архив қызметкерлерін құттықтады.
Архив ғимаратының құрылыс жұмыстарын «Энерго Строй Проект» ЖШС жүргізген. Жоба құны 215,5 млн теңгені құрады. Заман талабына сай салынған ғимараттың іші құрал-жабдықтармен қамтамасыз етілген. Атап айтар болсақ, құжаттарды шаңнан тазарту үшін қолданатын арнайы аппарат қойылған. Ол тек шаңнан ғана тазартып қоймайды, дезинфекциялау жұмысын да атқарады. Бұдан бөлек, мұнда кітаптар мен құжаттарды жылдам және сапалы цифрландыру үшін Microbox book2net Kiosk планеталық сканері де орнатылған.
Ғимаратта құжаттарды есепке алу және қабылдау бөлмесі, жұмыс кабинеті, мәжіліс залы да бар. Бір сөзбен айтқанда, мамандардың жұмыс істеуіне бар жағдай жасалған.
Дастан ҚАСЕНҰЛЫ
Райымбек ауданы
