Илон Маск жетекшілік ететін SpaceX компаниясы алдағы жарты жылдың ішінде Қазақстанның шалғайда орналасқан 2 мың ауылындағы Интернетпен қамтамасыз етеді. Бұл туралы Астанада өтіп жатқан Digital Bridge 2023 халықаралық форумы аясындағы брифингте Цифрлық даму, инновациялар және аэроғарыш өнеркәсібі министрі Бағдат Мусин мәлім етті.
«Форумға SpaceX төрағасының орынбасары (SpaceX Starlink бизнес-операциялары жөніндегі директоры Лорен Дрейер) келген болатын. Онымен екіжақты кездесулер өтті. Ол Президент мырзамен кездесуі барысында пилот ретінде шалғайдағы 2 мың ауыл мектебін SpaceX Starlink технологиясы арқылы интернетке қосуға келісімін берді. Біз көп ұзамай, жарты жылдың ішінде 2 мың ауылдағы мектепті Starlink арқылы жылдамдығы жоғары Интернетке қосамыз», – деді министр.
Оның айтуынша, SpaceX Starlink технологиясының игілігін тек мұғалімдер мен оқушылар ғана емес, сонымен қатар ауыл тұрғындары да көреді.
«Меніңше, ол жалпы ауылдағы Интернетке қосылам деушілерге үлкен мүмкіндік береді. Өйткені, ол ауылдарда 200-ден 500-ге дейін адам тұрады. Олардың арасында интернет мүлдем жоқ ауылдар да бар. Сол ауылдарға 100-200 Мбит-тік интернет жеткізілген кезде тұрғындар мектептегі интернетті пайдаланып, өздеріне қажетті сервистерді жүктей алатын болады», – деді Бағдат Мусин.
Министр сонымен қатар 2025 жылдың соңына дейін республикалық маңызы бар Астана, Алматы, Шымкент қалаларының кемінде 75 пайыз және облыс орталықтарының 60 пайыздан астамы 5G желісімен қамтылатынын да жеткізді. Яғни, әрбір облыс орталығы аумағының 60 пайыздан астамы 2025 жылдың соңына дейін 5G технологиясымен қамтылатын болады.
