Отбасы адамға жылулық пен қорған болатын орта болуы тиіс. Өкінішке қарай, кейбір шаңырақта дау-жанжал жиілеп, оның соңы психологиялық немесе физикалық зорлыққа ұласып жатады. Мұндай жағдайды «отбасының ішкі мәселесі» деп қабылдау дұрыс емес. Себебі зорлық-зомбылық адамның қауіпсіздігіне ғана емес, оның ар-намысы мен психологиялық жағдайына да әсер етеді. Әсіресе балалардың мұндай ортада өсуі олардың мінезі мен болашақ қарым-қатынасына кері ықпал етуі мүмкін. Сондықтан отбасындағы жанжалдың алғашқы белгілеріне немқұрайлы қарамаған жөн. Қиын жағдайға тап болған адам көмек сұраудан ұялмауы керек. Жақындарының қолдауы, мамандардың кеңесі және тиісті органдардың көмегі мәселені шешуге мүмкіндік береді. Қоғамда зорлықты ақтайтын түсініктер азайған сайын, жәбірленушілердің де көмекке жүгінуі жеңілдейді. Бейбіт шаңырақтың негізі – қорқыныш емес, өзара құрмет пен түсіністік.
Сая ЕРБОЛАТҚЫЗЫ