«Мектеп оқушысы кәсіппен айналысып, табыс тауып отыр» дегенді естігенде оған әркімнің сенуі екіталай. Десе де, бұл мүмкін болатын нәрсе екеніне көзіміз жетті. Қарасай ауданына қарасты Береке ауылындағы орта мектептің 11-сынып оқушысы Берік Әжімбай мемлекет қолдауына ие болып, бүгінде ат әбзелдерін дайындау ісімен айналысуда. Жасөспірімнің жеке кәсібімен танысу үшін жақында ол тұратын елдімекенге арнайы барып, өнеріне тәнті болдық.
Жас шебер әкесінің қасында жүріп атадан қалған қолөнердің қыр-сырын меңгерген. 16 жастағы оқушының кәсіп ашуына «Тәуелсіздік ұрпақтары» жобасы ықпал еткен. Соның арқасында қайтарымсыз грант ретінде 1 млн теңге қаржыға қол жеткізіп, отбасылық кәсіпті ілгерілетуге үлес қосқан. Қазіргі таңда Берік шағын шеберханада ер-тоқымнан бастап, жүген, ноқта, үзеңгі сынды ат әбзелдерін жасаумен айналысады.
– Жоба аясында ұтқан 1 млн теңге қаражат сапалы былғары алуымызға септігін тигізді. Материалдың жақсы болғаны ертоқымды сатып алушылардың да көңілінен шығуда. Тапсырыс та арта түсті, – деп жас кәсіпкер мемлекеттің қолдауын ерекше атап өтті.
Оның «Тәуелсіздік ұрпақтары» жобасымен танысуына Қарасай аудандық жастар ресурстық орталығы себепкер болғанын айта кету керек. Орталық мамандары мемлекеттің ұтымды бастамаларын аудан көлемінде дәріптеуден қалыс қалған емес.
Берік Әжібай түске дейін мектепте білім алса, түстен кейін шеберханадағы міндетін орындап, әкесі мен бауырларына көмектеседі. Беріктің ендігі арманы – атасының жолын қуып, осы кәсіпті жоғары деңгейде дамытып, үлкен цех ашу.
– Жамбыл облысы Мойынқұм ауданында менің атамның атқа қажетті жабдықтарды дайындайтын үлкен цехы болыпты. Мен де атам сияқты бизнесімді одан әрі жетілдіріп, ауқымы кең ғимаратта жұмыс істегім келеді. Сөйтіп, қолөнер саласын көпке таныстырып, оны жан-жақты дамытсам деймін. Бір жағынан, елдің экономикасын арттыруға қосқан үлесім болар еді, – дейді талабы таудай оқушы.
Қазақтың қолөнерін таныту арқылы табыс тауып отырған ізденімпаз оқушының болашағы жарқын болсын демекпіз. Арманы асқақ балалардың жастайынан еңбекқор болғаны кімді болсын қуантары анық. Айта кетейік, «Тәуелсіздік ұрпақтары» жобасы әлі де жалғасуда. Ресми дерекке сүйенсек, былтыр аталған жобаның аясында Алматы облысында 10 жас кәсіпкер 1 млн теңгеден қаржылай қолдауға ие болған. Қазіргі уақытта олар әр салада өз кәсібімен айналысып, жемісін көруде.
Дидар Мәлікұлы,
Қарасай ауданы
