Заңғар тұлға Заманбек Нұрқаділовтің 80 жылдығына орай өткен аста Президент Қасым-Жомарт Тоқаевтың арнайы хаты оқылды. Онда Мемлекет басшысы Зәкеңнің ел алдындағы еңбегін бағалай келіп, оған туған жерінде ескерткіш орнату, мектептің атын беру және өмірінің соңына дейін тұрған үйіне белгі қою керектігін жазған. Бұл қалың қазақтың талай жылдан бері аңсап, күтіп жүрген өткір мәселесі еді. Осындай бетбұрысы үшін Президентке бәріміз шын жүректен үлкен алғыс, рахмет айтамыз.
Жақсы хабарды естіген сәтте Алматының Медеу ауданындағы «Думан» ықшамауданынан Заманбек Нұрқаділовтің жерді қалай бергені ойыма оралды. 1989 жылы маусым айының ортасы еді. Мен ол кезде Талғар ауданы «Қызылқайрат» ұжымшарының төрағасымын. Шұғыл аупарткомның бірінші хатшысы Попович Александр Георгиевичтің кеңсесіне шақырылдым. Барсам, менен басқа сол кездегі «Луч Востока», «Мичурин», «Калинин» ұжымшарының басшылары, әріптестерім Лев Серов, Серік Әлиев, Бақберген Шалабаев та келген екен. Бірінші хатшы бізге бірден: «Мына «Луч Востока» ұжымшарының Алматыдан Талғарға шығаберіс біраз жерін біреулер басып алып, қазықтарын қағып, палаткаларын тігіп, қоныстанып жатқан көрінеді. Соған орай Алматы қаласының басшысы Заманбек Нұрқаділов қазір бізге келеді. Сендер, ұжымшар басшылары, не айтасыңдар? Бұл қалай болады?» – деді.
Кешікпей Заманбек Нұрқаділов кіріп келді. Залда отырған біздерді аупартком хатшысы А.Попович Зәкеңе таныстырып шықты. Кенеттен Зәкең: «Жігіттер, көпшілігің қазақ екенсіңдер, мына болып жатқан жағдайға қалай қарайсыңдар? Ұйғыр, Нарынқол, Кеген ауданынан, осы Талғардан, Алматы қаласынан үйсіз-күйсіз жүрген қазақтар «Луч Востока» ұжымшарының біраз жеріне қоныстанып жатыр. Өздерің бұған не дейсіңдер?» – деді. «Луч Востока» ұжымшарының басшысы: «Бұл жерге мал азығы, сүрлем, жүгері дақылы себіледі ғой», – деп уәж айтты. Ол жерді бергісі келмеді.
Зәкеңнің көзі шетте отырған маған түсті. Содан мен орнымнан тұрып өзімді таныстырдым. Маған: «Сен Талғардың тумасы екенсің, не дейсің?» – деді. Талғар ауданында басшылардың көбісі ол кезде орыс ұлтынан, оның ішінде, қазақтардың өзі басқа өңірдің азаматтары еді. Зәкеңнің маған айтылған сөзі жігерлендіріп, намысымды қайрап жіберді. Мен бірден: «Ұжымшарларда жарғы бар, басқарма, ауылдың жалпы жиналысы бар, сол арқылы бұл мәселе шешіледі. Жер мәселесін «Луч Востока» ұжымшарының төрағасы Л.Серов өзі ғана немесе Талғар аупарткомның бірінші хатшысы жеке отырып шешпесі анық», – деп салдым. Сонда Серік Әлиев, Бақберген Шалабаев менің айтқанымды қолдады. Л.Серовтың мал азығын қайтемін деген уәж-сылтауына мен: «10 гектар көлеміндегі жеріңнің есесіне Қызылқайраттан сүрлем беремін», – дедім.
Содан тарқасып, далаға шыққанда мен Зәкеңе тағы да: «Алматы облысында 35 ұжымшар бар. Оның облыстағы кеңесін Қазтай Ұлтарақов ағамыз басқарады. Сол кісіге де айтқаныңыз дұрыс еді», – дедім. Осылайша, бүгінде «Думан» шағынауданының үлкен елдімекен болуына, біртіндеп өсіп, Медеу ауданының құрамына кіруіне ұлтжанды азамат, мемлекет және қоғам қайраткері Заманбек Нұрқаділовтің сіңірген еңбегі орасан. Сондықтан, Президент Қасым-Жомарт Тоқаевтың жақсы бастамасын баршамыз болып қолдап, Зәкеңнің есімін «Думан» ықшамауданына немесе сол жердегі №172 мектеп-гимназияға беруді құп көрер едік. Бұл бастаманы ықшамаудан тұрғындары мен облыс, аудан жұртшылығы да қолдайды деп сенемін.
Нұрсұлтан Сәрсеков,
Талғар ауданының
Құрметті азаматы
