Арада 80 жыл өткеннен кейін болып жатқан су тасқыны, техногендік апат екенін көріп отырмыз. Күннің күрт жылынуы мен бірнеше күн жауған жаңбырдан кейін, қыс бойы жауған қалың қасат қар, тез арада еріп ерік бермей, су қоймаларын толтыра асып, тоспа бөгеттерді бұзып, өзендер арнасынан шығып, жойқын су бірнеше облыста елдімекендерді басып қалды. Инфрақұрылым, жол, көпірлер, көптеген шаруашылықтардың қора-жайлары, малдары қарғын су құрбаны болуда. Президентіміз Қасым-Жомарт Тоқаев халықты тыныштық сақтап, бір жеңнен қол, бір жағадан бас шығарып, жұмылған жұдырықтай болып, ел болып күрессек бұл сынақтан да сүрінбей өтетінімізге сенімді екенін, су апатынан келген барлық шығынды өңірлерде құрылған комиссия анықтағаннан кейін толық төленетінін, ешбір адам ұмыт қалмайтынын қадап айтты. Қазіргі таңда Үкімет басшысы, министрлер, парламент депутаттары, мемлекеттік мекеме, ведомство басшылары мен әскери құрылымдар, 20 мыңнан астам еріктілер, бүкіл халық болып апатпен күресуде. Халқымыз небір нәубетті бастан кешіріп, оны жеңе білген, “бір қиындық артынан бір жақсылық болады” демекші, бұны да жеңетінімізге, әлі-ақ ауыртпалық артта қалып, бәрі қалпына келіп, еліміздің келешегі кемел болатынына сенімдіміз!
Тынышбай Досымбеков,
Алматы облыстық қоғамдық кеңестің мүшесі,
Алматы облысының Құрметті азаматы
