Мемлекеттік қызметке тұрғысы келетін үміткерлерден енді қазақ тілін білуі талап етілуі мүмкін. Бұл туралы Астанада президент жанындағы Орталық коммуникациялар қызметінде өткен брифингте Мемлекеттік қызмет істері жөніндегі агенттік төрағасының орынбасары Азамат Жоламанов хабарлады.
Оның айтуынша, қазіргі күні мемлекеттік қызметкер азаматтармен қарым-қатынаста олар қай тілде сөйлесе сол тілде жауап беруге міндетті. «Қазір мемлекеттік басқару академиясына магистратура және докторантура бағдарламасына оқуға түскісі келетіндерге қойылатын талаптардың бірі – мемлекеттік тілді білуі ортадан төмен болмауы тиіс. Сонымен қатар, президенттің жастар кадрлық резервіне іріктеуде мемлекеттік тілді меңгеруі туралы талап қойылған. Біз қазір мемлекеттік қызметке қабылданарда мемлекеттік тілді меңгеру деңгейі жөнінде талап енгізуді қарастырып жатырмыз», – деді Жоламанов.
Азамат Жоламановтың сөзінше, мемлекеттік қызметкердің мемлекеттік тілді білуі мәселесі соңғы уақытта қоғамда жиі көтеріліп жүр.
