Энергетика министрінің міндетін атқарушы Болат Ақшолақов елімізде бензин мен дизель отынының бағасын көтеруді ұсынды. Бұл туралы ол елордада өткен брифингте мәлімдеді.
«Ішкі жанар-жағармай нарығын тұрақтандыру үшін Қазақстан мен көрші елдер арасындағы баға айырмасын төмендету керек. Сол себепті қазір бұл күрделі, бірақ қажет қадам жасап, шекті бөлшек бағаны көтеруге тиіспіз», – деді Ақшолақов.
Оның сөзінше, АИ-92 және АИ-93 маркалы бензиннің бағаларын аймақтарға қарай 182-187 теңгеден литріне 205 теңгеге дейін, яғни 11 пайызға қымбаттату керек. Ал жаңа баға бойынша дизельдің литрі 295 теңгеге жетіп, орта есеппен 20 пайызға қымбаттайды. Қазір өңірлерде дизель отынының бағасы 230-260 теңге аралығында.
«Тиісті қаулы бүгін жарияланады. Егер баға айырмасын қазір азайтпасақ, онда таяу уақытта жанармай тапшылығына тап боламыз. Одан бөлек, бұл саланың одан ары дамуын тежеп, елдің энергетикалық қауіпсіздігіне қатер төндіреді», – деді министр міндетін атқарушы. Оның сөзінше, жанармай бағасы 12 сәуірден бастап қымбаттайды.
Ақшолақовтың сөзінше, Қазақстандағы үш мұнай өңдеу зауыты жаңартылып, бұрынғыдан көп жанармай өндіріле бастағанымен, елдің кей өңірлерінде жанармай тапшылығы сезілген. Бұған ел аумағынан транзитпен өтетін көліктердің жанармайға деген сұранысының артуы және жанармайдың көрші елдерге астыртын жолмен шығарылуы себеп негізгі себеп болып отыр.
