Құрметті отандастар!
Баршаңызды Қазақстан Республикасының Конституциясы күнімен шын жүректен құттықтаймын!
Бұл күн еліміздің еркіндігі мен тәуелсіздігінің, тұрақтылығы мен қауіпсіздігінің кепілі ретіндегі тарихи маңызы зор мереке болып мәңгілікке қала бермек.
Конституция – мемлекеттік құрылыстың құқықтық негізін қалыптастырушы құжат. Ол мемлекеттік тетік, қоғамдық, саяси институттар ретінде қызметтің негізі боларлық принциптерді орнықтырды, адам мен азаматтың конституциялық мәртебесін белгіледі, экономикалық құрылыстың негіздерін айқындады.
Тарихқа жүгінсек, Қасым ханның «Қасқа жолы» мен Есім ханның «Ескі жолы» етегімізді жинап, ел болуымызға көп септігін тигізді. Ал Тәуке ханның «Жеті жарғысы» бүгінгі Ата Заңымыздың алғышарты ретінде тарих сахнасынан ұмытылмақ емес.
Еліміздің егемендігі мен тәуелсіздігі баянды болсын! Сіз бен біздің құқығымызды қорғап, ұрпағымызға жарқын жол сілтейтін Конституцияның әр бабы мен талаптарына жауапкершілікпен қарайық. Ата Заңымызды құрмет тұтайық!
Мереке құтты болсын! Тәуелсіз еліміздің берекесі таси берсін!
Ізгі ниетпен,
Алматы облысының әкімі Марат Сұлтанғазиев
