Қаңтар айының 21-22-сінде күннің күрт жылынуына байланысты Алатаудан аққан қар суы Іле және Қарасай аудандарының шекарасын қиып өтетін Жармұхамбет су арнасының деңгейін көтерді. Салдарынан Жармұхамбет ауылымен қатар Іле ауданының біршама аймағын су басу қаупі артты. Су тасқынының алдын алу шаралары бойынша ауыл тұрғындарына Қонаев десанттық-шабуылдау әскерлерінің әскери қызметшілері көмекке келді.
Қарасай ауданына қарасты Жармұхамбет ауылында шамамен 10 000 адам тұрады. Өткен аптада ауарайы жылы болды және өзендегі су деңгейі айтарлықтай көтерілді. Кей жерлерде Іле ауданына қарасты тұрғын үйлердің аулаларын толтыра бастады. Іле ауданының әкімі Қайыржан Жақсымбетов өткізген шұғыл кеңестен кейін Қазақстан Республикасы Қарулы Күштерінің десанттық-шабуылдау әскерлері қолбасшысының көмегіне жүгіну туралы шешім қабылданды. «Генерал-майор Алмаз Жұмакеев ауыл тұрғындарына өзеннің жағалау сызығын нығайту жұмысын жүргізу үшін 43 десантшы-әскери қызметшіні көмекке жіберді. Сарбаздардың жылдам көмегінің нәтижесінде ағынды су қарқыны тез ауыздықталды. Жармұхамбет ауылының тұрғындары көмек көрсеткені үшін әскерилерге шын жүректен алғысын білдіреді», – деді Іле ауданы әкімінің орынбасары Алмас Бөкенаев.
Айта кетейік, дәл осы екі күндік жұмыс барысында тұрғын үй алаптарын су басуға жол бермеу мақсатында 800 метрден астам су бөгеу құрылысы жүргізіліп, 2500-ден астам қапшық төселді.
Бағдат ШОЙБАС
Іле ауданы
