Ұзынбұлақ Мәдениет үйінде ауылдық аналар кеңесінің ұйымдастыруымен он саусағынан өнер тамған жергілікті шеберлермен кездесу кеші өтті. Шараның мақсаты – ұлттық қолөнерді жас ұрпаққа дәріптеу.
Шеберлер қолынан шыққан туындыларын жан-жақты паш етті. Әсіресе ою-өрнектен заманауи көркем дүниелер жасап жүрген Қайшан Бөкейқызының бай тәжірибесі көпшілікті қызықтырды. Серік Сәлиұлы мен Құдайберген Егізеков тартпа, құйысқан, жүген, ноқта сынды ер-тұрманға қажетті бұйымдардың технологиясымен таныстырды. Сонымен қатар шеберлік сағатында көрпе жасау мен құрақ құрау да назардан тыс қалмады. Асыл тастардан жасалған моншақ пен білезік, сақина мен сырға қатысушылардың қызығушылығын тудырды.
«Қолөнер адамның дүниетанымына, наным-сеніміне, адамгершілік қасиеттерінің қалыптасуына, алға қойған мақсатының айқындалуына әсер етеді. Сондықтан дана халқымыз бұл өнерді ерекше бағалаған. Бүгінгі таңда ұлттық құндылықтарымыз қайта жаңғыруда. Өткізіліп отырған іс-шара соның бір парасы», – деді аналар кеңесінің төрағасы Алмагүл Түзелбекова.
Шара соңы Мәдениет үйінің өнерпаздары дайындаған концерттік бағдарламаға ұласты.
Дәурен ӘБУТӘЛІПОВ
Кеген ауданы
