Мемлекет басшысы Қасым-Жомарт Тоқаевтың тапсырмасына сәйкес, былтыр Үкіметтің №910 қаулысымен «Таза Қазақстан» экологиялық мәдениетін дамытудың 2024-2029 жылдарға арналған тұжырымдамасы бекітілген болатын. Бұл – еліміздің экологиялық жағдайын жақсартуға және табиғат ресурстарын сақтауға, қоршаған ортаны қорғауға бағытталған кешенді шара.
Экологиялық саясаттың негізгі бағыттарын айқындайтын басымдықтың бірі – жастарды экологиялық жобаларға тарту. Осы орайда аталған тұжырымдаманы жүзеге асыру бағытында Балқаш ауданы Үлгілі орта мектебінде біртұтас тәрбие бағдарламасы шеңберінде жүйелі жұмыстар атқарылуда.
Білім ордасында ұйымдастырылған экологиялық тәрбиені насихаттайтын шара «Іле-Балқаш» мемлекеттік табиғи резерватының қолдауымен «Таза Қазақстан» акциясы аясында өтті. «Жасыл Life» мүшелері, «Іле-Балқаш» мемлекеттік табиғи резерваты қызметкерлері қатысқан танымдық шара сырлы сұхбатқа толы болды.
«Жасыл Life» мүшелері жабайы жиде тұқымын арнайы ыдыстарға егу арқылы туған жерге деген махаббатты, қамқорлықты сезіне түсті. Енді сол тұқымдарды «Іле-Балқаш» мемлекеттік табиғи резерватының жылыжайына орналастырып, өсіп-өнуін басты назарда ұстамақ. Ерте көктемде бой көтерген жас өскіндерді резерват ауласына, кейіннен арнайы алқапқа отырғызу жоспарлануда. Мектеп оқушыларының осындай тапсырманы аса жауапкершілікпен орындауы – елге деген сүйіспеншілік сезімдерінің нәтижесі.
«Таза Қазақстан» экологиялық мәдениетіне бағытталған іс-шараның жоғары деңгейде ұйымдастырылуы – табиғатты қорғауға қосқан әр перзенттің зор үлесі. Мұндай шаралардың өскелең ұрпақтың экологиялық әдеттерді қалыптастыруға және жаңа бастамаларды жандандыруға мүмкіндік беретіні сөзсіз.
Шолпан ҚОШАХАНОВА,
Балқаш аудандық білім бөлімі
басшысының міндетін атқарушы
