Өңірлік коммуникациялар қызметінің ақпараттық алаңында өткен брифингте облыстық туризм басқармасының басшысы Қуанышбек Мейрамбекұлы 9 айда атқарылған жұмыстарды баяндады.
Спикердің сөзіне жүгінсек, биыл туристердің қатары көбейген. Әсіресе ұлттық саябақтарға келушілер саны 35,5 пайызға өскен. Шетелдік азаматтарды есепке алу жөніндегі «eQonaq» ақпараттық жүйесінің дерегі бойынша шетелдік туристер саны өткен жылмен салыстырғанда 7,6 пайызға артқан.
– Облыстағы туристер көп келетін негізгі демалыс аймағы – Қапшағай су қоймасы. Биыл жазғы шомылу маусымында су қоймасына шамамен 1,8 млн адам келді. Жағалауда 8 қалалық коммуналдық жағажай және 140 туристік нысан жұмыс істейді. «Freedom Holding» инвесторының қолдауымен №5 жағажайға ауқымды абаттандыру жүргізілді. Атап айтқанда, құны 4,53 млрд теңгені құраған жоба аясында 48 бейнебақылау камерасы, 42 киім ауыстыруға арналған, 25 жуыну кабинасы орнатылды, 3 қоғамдық санитарлық-гигиеналық торап жабдықталды. Қоқыс салуға арналған 25 жәшік, 45 бөшке, 10 контейнер орналастырылды, 4 құтқару мұнарасы тұрғызылды. Демалушыларға 500 шатыр мен шезлонгтар ұсынылды. Ақпараттық тақталарға қауіпсіздік ережелері ілініп, су көлігі мен шағын көлемді кемелерге арналған 2 аймақ ұйымдастырылды, – деді басқарма басшысы.
– Аймақтың су айдындарында қоғамдық тәртіп пен қауіпсіздікті қамтамасыз ету үшін 11 мобильді құтқару бекетіндегі патрульдік топтар 45 жүзу құралы мен 31 бірлік техника пайдаланылды. Ерекше қорғалатын табиғи аумақтарда туристік бағыттар мен соқпақтарды абаттандыру бойынша жобалар жүйелі түрде іске асырылуда. «Freedom» компаниясының жеке инвестициялары есебінен Көлсай көлдері және Шарын мемлекеттік ұлттық табиғи паркінің аумағында тегін Wi-Fi және Starlink спутниктік жүйесі қосылды. «Көлсай көлдері» және «Іле Алатауы» ұлттық парктерінің кіру бекеттері автоматтандырылып, онлайн-төлем жүйесі енгізіліп, оншақты бейнебақылау камерасы орнатылды. Былтыр Көлсай мен Қайыңды көліне апаратын ұзындығы 425 метр соқпақты абаттандыру жұмысы жүргізілді. Биыл Көлсай көлдері, Іле Алатауы аумақтарында және Қонаев қаласында пирстер, эко-баспалдақтар, кіру топтары, от жағу аймақтары және металл жақтауда жаңа соқпақтар орнату жоспарлануда. Сонымен қатар Жамбыл ауданындағы Қастек шатқалынан Шарын ұлттық паркіне дейінгі туристік бағыт құруды көздейтін «Алатау аманаты» жобасы іске асырылуда, – деген Қуаныш Мейрамбекұлы туризм саласында іске асырылатын инвестициялық жобалар жайында да сөз қозғады.
Айтуынша, бүгінде өңірде инвестициялық жобалардың бірыңғай пулы бар. Оған 29 инвестициялық жоба кіреді. Жеке инвесторларды кезең-кезеңімен тарта отырып, 5 жылдан астам уақыт бойы іске асырылады. Соның бірі – Қонаев қаласында яхта айлағы бар халықаралық деңгейдегі курорттық ойын-сауық жағажайын салу. Бұл құрылыс 2027 жылы аяқталады деп жоспарлануда. Жоба толық іске асқанда 700 жаңа жұмыс орны ашылады. Ал Кеген ауданында Қара шатқал үстінен шыныдан аспалы көпір салу жобасы жүзеге асырылуда. Оны «ASK Capital» ЖШС салуда. «Sokol» спорттық-техникалық кешені де – республикалық маңызы бар ауқымды жоба. Ол авто-мото, драг, дрифт және картинг жарыстарын өткізуге арналған алаңдарды қамтиды. Сондай-ақ «AYKAN RESORT» ЖШС жеке инвестицияларды тарта отырып, Талғар ауданында элиталық аквапарк пен «Aquasia» отбасылық демалыс орталығының құрылысын аяқтады. Жуырда пайдалануға берілмек.
Басқарма басшысы сөзінің соңында аталған жобалар облыстың дамуы мен жаңа туристік келбетінің қалыптасуына айтарлықтай әсер ететінін жеткізді.
Тоғжан ЖОЛДЫҒАЛИ
