Кеген ауданында Қарқара көтерілісінің 100, Жамбыл Жабаевтың 180 және Қапез Байғабылұлының 130 жылдығына арналған «Қарқара – тарих, Жамбыл – жыр, Қапез – әуен» атты айтыс мектептерінің тәлімгерлері арасында облыстық ақындар айтысы өтті.
Тағылымды шараны облыстық халық шығармашылығы орталығы Кеген аудандық Мәдениет үйімен бірлесе ұйымдастырды. Айтыс аламанына әр өңірден 12 ақын қатысып, көрерменге шынайы сөз сайысының көркем үлгісін ұсынды. Кеген төрінде елдік мұрат, ұлттық рух, еңбек адамының абыройы мен тарихи тұлғалардың өнегелі мұрасы жырға қосылып, әр шумақтан елге деген сүйіспеншілік пен жауапкершілік айқын сезілді.
Сөз додасын Халықаралық айтыскерлер одағы Алматы облыстық филиалының төрағасы, ақын Айбек Ережеп жүргізді. Шараның шымылдығын Кеген аудандық мәслихат төрағасы Алмасбек Нұғыман құттықтау сөзбен ашып, ақындарға сәттілік тіледі. Ал Мәдениет үйінің директоры Еркебұлан Нұрбайұлы айтыстың рухани маңызына тоқталып, ұлттық өнерді ұлықтау ортақ міндет екенін атап өтті.
Жыршы Әбіш Әділбекұлы ұйымдастырушыларға алғыс білдіріп, ақындарға ақ жол тіледі. Әділқазылар қатарында шайыр Даубай Әбдісаев, актер Омар Қиқымов, депутат Алмасбек Нұғыман, сондай-ақ ақындар Серік Сүйіндік, Шеризат Мекебаев пен Аршын Нұрбақыт болды. Олар қатысушылардың тақырыпты ашу шеберлігіне, сөз тапқырлығына және сахна мәдениетіне ерекше мән берді.
Қазылар шешімімен Кеген ауданының намысын қорғаған Расул Сауытбек бас жүлдені иеленді. І орын Қонаев қаласынан келген Шынарбек Тұрсынға бұйырса, ІІ орынды Балқаш ауданының өкілі Жалғас Садыр мен кегендік Еңлік Оразақын бөлісті. ІІІ орын Еңбекшіқазақ ауданының өнерпазы Қожан Нұргелді мен Райымбек ауданының айтыскер ақыны Аят Жәнібекке табысталды.
Дәурен ӘБУТӘЛІПОВ
Кеген ауданы
