Қойнауы құтқа толып, бірлігі мен ынтымағы жарасқан, бақ дарыған Балқаш өңірінің жұртшылығы да 1 мамыр Қазақстан халқының бірлігі күнін жоғары деңгейде атап өтті. Мерейлі мереке Балқаш аудандық Мәдениет үйінде “Қазақстан – татулықтың мекені” тақырыбында ұйымдастырылды.
Салтанатты шараның шымылдығын түрген Балқаш ауданының әкімі Азат Құтпанбетов өңір тұрғындарын мерейлі мерекемен құттықтап, ақжарма лебізін арнады.
– Бұл мереке – татулық пен келісімнің, өзара құрмет пен достықтың жарқын символы. Еліміздегі барлық этнос өкілдерінің ынтымағы мен бірлігі – Тәуелсіз қазақстанның басты байлығы. Ортақ мақсат жолында бірлесе еңбек етіп, бейбітшілік пен тұрақтылықты нығайту – баршамыздың ортақ міндетіміз, – деді аудан басшысы.
Сонымен қоса Азат Үкітайұлы құттықтау сөзінде Мемлекет басшысы Қасым-Жомарт Тоқаевтың «Біз әртүрліміз, бірақ бәріміз теңбіз», «Қазақстанның халқы біртұтас» деген қағидаттарын негізге алып, бұдан кейін өңірдің әлеуметтік-экономикалық дамуына сүбелі үлес қосып жүрген бірқатар азаматтарды Алғыс Хатпен марапаттады.
Марапаттау рәсімінен кейін іс-шара мекеме-ұйым қызметкерлері мен аудан өнерпаздары дайындаған мерекелік концертке ұласты.
Концерттік бағдарлама барысында өнерпаздар бір шаңырақ астында бас қосқан көптеген ұлт өкілдерінің ұлттық киімдерін киіп, тіпті әнін әуелете шырқап, мың бұрала би биледі.
Сахна төрінен орын алған әсем әуен, жоғары деңгейде ұйымдастырылған мерекелік кеш көпшіліктің көңілінен шығып, көрермен қауым қошеметін еселей түсті.
“Бірлік болмай, тірлік болмас” демекші,
“Тілі басқа болғанмен тілегі бір, жүзі басқа болғанмен жүрегі бір” көптеген ұлт өкілдерінің бір шаңырақ бірлік пен ынтымақты ту етіп, татулықта ғұмыр кешуі – достығымыздың берік, мақсат пен міндеттеріміздің ортақ екендігінің айқын дәлелі. Береке-бірлігіміз ажырамасын!
Алтынай СЕЙТКЕН
Балқаш ауданы
