Талғар ауданындағы №833 сайлау учаскесінде Олимпиада финалисті, қазақстандық балуан Демеу Жадыраев дауыс берді. Спортшы Қазақстан Республикасы Құрылтайы депутаттарының сайлауына қатысып, азаматтық таңдауын жасады.
Демеу Жадыраев үшін бұл күн тек дауыс беру рәсімімен шектелмейді. Оның айтуынша, ел өміріндегі маңызды кезеңдерде әр азаматтың белсенділігі мен жеке таңдауы қоғамның ортақ жауапкершілігін қалыптастырады.
«Кілемге шыққанда спортшы әрбір қадамы мен шешіміне өзі жауап береді. Ел азаматы ретінде де дәл солай: болашаққа қатысты таңдауға саналы түрде қарау маңызды. Дауыс беру – азаматтың өз пікірін білдіруінің және ел тағдырына бейжай қарамайтынын көрсетудің бір мүмкіндігі», – деді Демеу Жадыраев.
Олимпиада финалисті спорттағы үлкен мақсаттарға жүйелі еңбек, төзім мен тәртіп арқылы жетуге болатынын атап өтті. Оның пікірінше, осы қасиеттер қоғамдық өмірде де маңызды: елдің дамуына үлес қосу күнделікті жауапкершіліктен және белсенді азаматтық ұстанымнан басталады.
Сондай-ақ Демеу Жадыраев жастарды өз болашағына немқұрайлы қарамай, спортта да, білімде де, қоғамдық өмірде де белсенді болуға шақырды. Ол жас буынның ел алдындағы жауапкершілікті сезінуі Қазақстанның келешегі үшін маңызды екенін жеткізді.
№833 сайлау учаскесінде дауыс берген Демеу Жадыраев осылайша өз азаматтық ұстанымын білдіріп, сайлау науқанына қатысты.
Талғар ауданы