Алматы қаласындағы автобустарда жүргізушілерді көлік салонынан оқшаулап тұратын қалқа орнатылады деп хабарлады ҚазАқпарат.
Тілшілермен кездескен қалалық мобильділік басқармасының басшысы Сағындық Телібаев апатты жағдайда басатын түйме орнату туралы ұсыныс түскенін айтты. «Қазір оның техникалық жағы қарастырылып, талқыланып жатыр. Келешекте мүмкіндік болса әрине, орнатамыз. Сонымен қатар қазір жаңа автобустар сатып алып жатырмыз. Онда жүргізуші мен жолаушылар арасын бөліп тұратын қалқа қоюды да қарастырып жатырмыз», деді Телібаев.
Ол бұл мәселелер 2023 жылы желтоқсанда Алматы қаласында болған жантүршігерлік жол апатынан кейін талқылана бастағанын айтты.
Былтыр 22 желтоқсан күні кешқұрым Алматыда №47 маршрутта келе жатқан жолаушы жүргізуші әйелмен сөзге келіп, соққыға жыққан еді. Соққыдан әйел есінен танып, автобус рөліне ие бола алмай қалған. Салдарынан автобус аялдамаға жақын тұрған бірнеше адамды қағып, төрт көлікпен соқтығысқан. Жол апатынан үш адам оқиға орнында, жедел жәрдем көлігі жеткенге дейін қаза тауып, үш адам жараланып ауруханаға түскен. Марқұмдардың екеуі – ерлі-зайыпты, артында төрт баласы қалды.
Жүргізушіні ұрған ер адам қамауға алынып, үстінен Қылмыстық кодекстің 293-бабы (бұзақылық) және 351-баптың 3-бөлімі (екі және одан көп адамның өліміне әкеліп соқтырған, көлік құралын қауіпсізды қастамасыз ететін басқару ережесін бұзу) бойынша іс қозғалды.
Бұған дейін Алматы полициясы қаладағы жолаушы автобустарын «102» арнасына қоғамдық көлік мекемесінің диспетчерлік қызметіне қосатын арнайы түймемен жабдықтауды ұсынған.
