Облыстық орталық әмбебап кітапханасында ақын Берік Баиловтың «Өмірімнің өрнегі» кітабының тұсаукесер рәсімі өтті. Қаламгердің бұрын еш жерде жарияланбаған жаңа туындылары топтастырылған жинақ – өлең өлкесінде өзіндік қолтаңбасын қалдырып жүрген шайырдың үшінші кітабы. Тілі шұрайлы, мағынасы терең туындылары қалың оқырманға етене таныс Берік Шәріпұлының әдеби кешіне облыстық кітапхана ұжымы үлкен қолдау танытып, рухани шараға мұрындық болған. Өлеңсүйер қауымның басын қосқан тағылымды жиынға танымал ақын-жазушылар, зиялы қауым өкілдері, ақынның туыстары қатысып, ыстық лебіздерін арнады.
Рухани басқосуды ашқан кітапхана қызметкері Алғабек Хамитұлы өмірі өлеңмен өрілген ақынды ардақтап келген қадірлі қонақтарды таныстырды. Сахнаға көтерілген Қазақстан Жазушылар одағының мүшесі, ақын Кәдірбек Құныпияұлы кеш иесінің шығармашылық әлеуетін жоғары бағалап, өлеңдерінің нәзік иірімдеріне, сыршылдығына ерекше назар аударды. Туған жер, өскен орта, өмір жайлы толғаныстары мен адамгершілік қағидасынан аттамайтын туындыларын оқырманға орамды ой салар қайталанбас жауһарға теңеді. Қазақстан Жазушылар одағының мүшесі, жазушы Нұрдәулет Ақыш та ақынның біліктілігі мен білімділігін тілге тиек етіп, ел тарапынан еңбегі бағаланған азамат екенін айтты. Ақынның кітапханаға деген құрметінің биік екенін, үнемі үздік оқырман атанатынын сөзіне қосқан Қонаев қалалық кітапханасының директоры Айгүл Бегімбайқызы қала әкімінің құттықтау хатын оқып берді. Әлем халықтары жазушылар одағының президенті Гүлхан Айтақынқызы
Берік Шәріпұлына Құрмет грамотасын тарту етті.
Үлкен экраннан Берік Шәріпұлының өмір жолы кестеленген бейнеүзінді көрсетілді. Семей облысы Шұбартау ауданы, Бидайық ауылында дүниеге келген ақын алғашқы өлеңін 7-сынып оқып жүргенде жазған. Жоғары оқу орнын бітіргеннен кейін Заречный ауылындағы қазақ орта мектебінде қазақ тілі мен әдебиеті пәнінің мұғалімі болып еңбек жолын бастаған. Өскелең ұрпаққа білім бере жүріп, қатардағы мұғалімнен мектеп директорының орынбасары, мектеп директоры лауазымына дейін көтерілген. Бүгінгі таңда Заречныйдағы кәсіптік колледждің директоры болып қызмет атқарып келеді. Өңір әдебиетінің өрлеуіне өзіндік үлес қосып, түрлі додалардың бас бәйгесінен көрінген.
Жұртшылыққа берері көп туындыларымен танылған, өлеңге деген махаббаты жүрегінен табылған Берік Шәріпұлының аталмыш кітабының жарық көруіне қолдау танытқан – білікті дәрігер, меценат Ғани Смаханұлы мен ел ағасы Абдрахман Есенбаев. Ақынның руханиятқа өлшеусіз үлес қосқан атымтай жомарт азаматтарға айтар алғысы шексіз.
Ақ тілектер ақтарылған әдеби кеште кітапхана ұжымы жаңа кітаптың ішінен өлең жолдарын мәнерлеп оқып, көпшіліктің қошеметін иеленді. Берік Шәріпұлының ұлы да әкесіне деген шексіз ықыласын жыр жолдарымен өрнектеп, асқар тауымен асқақтай берерін баяндады. Қонаев қаласындағы өнерлі балалар орталығының шәкірті Әлихан Атыхай қазақтың қасиетті домбырасын күмбірлетіп, көрермендерді күй әлеміне жетеледі. Аталмыш орталықтың ұстазы Фариза Әбілтаева ақынның сөзіне жазылған әндерден шашу шашса, құрметті қонақтардың қатарындағы аналарымыз дара дауыстарымен әдеби кешті әрлендіре түсті. Қорытынды сөз алған Берік Шәріпұлы өмір жайлы тебірене өлең оқып, ақынын ардақтаған кітапхана ұжымы мен қадірлі қонақтарға риясыз алғысын жеткізді.
Құралбек СӘБИТОВ
