Бүгінде мұғалімдер мен ата-аналарды алаңдатып тұрған өзекті мәселе – мектептегі әлімжеттік, зорлық-зомбылық, балалардың бір-бірін қорлауы, мазақ етуі, келемеждеуі, күш көрсетуі. Бір сөзбен айтсақ – буллинг. Ол әртүрлі формада кездеседі. Бұл құбылыс өскелең ұрпақтың психологиялық және физикалық саулығына теріс әсер ететіндіктен, оның алдын алу тек білім беру ұйымдарын ғана емес, қоғамды алаңдататын үлкен мәселеге айналып отыр.
Сондықтан білім ордаларында оқушыларға психологиялық көмек көрсетіліп, тәрбиелік мәні бар бағдарламалар жүзеге асырылып, заңнамалық іс-шаралар қолға алынуда. Соның бірі – Еңбекшіқазақ ауданы Ават ауылындағы Омар Мухаммадий атындағы орта мектепте ұйымдастырылған «Білім беру ұйымдарында зорлық-зомбылықтың алдын алу» атты біліктілікті арттыру курсы. Онда «Өркен» балалардың әл-ауқатын арттыру ұлттық ғылыми-практикалық институтының аға оқытушысы Дина Нұрғалиева психологтарға, сынып жетекшілерге, әлеуметтік педагогтарға және педагог-ұйымдастырушыларға дәріс берді.
Оқыту курсы зорлық-зомбылыққа қатысты нормативтік құқықтық құжаттарды қамтыды. Буллингтің түрлері және алдын алу іс-шараларының алгоритмі құрылып, оны іс жүзінде қолданудың жолдары үйретілді. Курсқа қатысушылардың ой-пікірі сараланып, талқыланды. Әрбір маманның өз бағыты бойынша жанын сала жұмыс атқаруы курс мақсатының айқындығын көрсетті.
Білім беру мекемелері қауіпсіз және қолайлы орта қалыптастыру үшін зорлық-зомбылықтың барлық түрімен күресуі тиіс. Мектептерде достық қарым-қатынасты насихаттайтын мәдениет қалыптастыру – маңызды. Мұғалімдер мен ата-аналар оқушыларға үлгі болып, оларға қиын жағдайлар туындағанда қалай әрекет ету керектігін үйретуі тиіс. Осы орайда мамандар «Бірлік түбі – береке» дегенді темірқазық етіп ұстанып, түйткілді мәселенің түйінін бірігіп тарқатуға бірлесіп атсалысса, өсіп келе жатқан жас ұрпақтың болашағы жарқын болатыны даусыз. Тек сонда болашақ ұрпақтың толыққанды және қауіпсіз дамуына маңызды қадам жасай аламыз.
Динара ТҰРБАЕВА,
«Өркен» балалардың әл-ауқатын
арттыру ұлттық ғылыми-практикалық
институтының аға оқытушысы
Талғар қаласы
