Өңірлік коммуникациялар қызметінің ақпарат алаңында облыстық құрылыс басқармасының басшысы Мұхамедғаріп Құрманғалиев «Жайлы мектеп» ұлттық жобасының жүзеге асырылу барысын баяндады. Облыстық білім басқармасы басшысының орынбасары Гүлсара Исағұлова аталған білім ошақтарының өзіндік ерекшеліктерін сөз етті.
«Жайлы мектеп» ұлттық жобасы шеңберінде Алматы облысының 5 ауданында 24 900 оқушыға арналған 26 мектептің құрылысы басталып, ол үшін республикалық бюджеттен 2023-2025 жылдарға 181,6 млрд теңге қарастырылды. Бүгінде 11 100 оқушыға арналған 9 мектеп пайдалануға берілген. Басқарма басшысы Мұхамедғаріп Ниязұлының айтуынша, «Samruk-Kazyna Construction» акционерлік қоғамы ұсынған нысандарды іске қосу жоспарына сәйкес биыл 17 мектептің құрылысын аяқтау жоспарланған.
– Ашылған мектептерде оқу-тәрбие іс-шараларын өткізу үшін трансформациялау мүмкіндігі бар әмбебап акт залы, медиатека, электронды кітапханамен қамтылған. Бұған қоса, автокөліктерге арналған тұрақ орындары, автобус бағыттары мен аялдамалар, тротуарлар салынған, іргелес аумаққа жарықтандыру жүргізілген, білім ошақтары жылумен және ыстық сумен қамтамасыз ететін блоктік-модульдік қазандықпен жабдықталған, – дейді Мұхамедғаріп Құрманғалиев.
Облыстық білім басқармасы басшысының орынбасары Гүлсара Исағұлованың сөзінше, өңірдегі өзекті мәселе саналатын үшауысымды мектептер жайы оң шешіп тауып келеді. Өткен жылы бірқатар білім ошақтарының салынуы үшауысымда білім беретін мектептер санын 53-тен 32-ге дейін азайтуға мүмкіндік берген.
– Алматы облысында жыл сайын 13 мыңнан аса бала мектеп табалдырығын аттайды. Сондықтан орын тапшылығын шешу үшін «Жайлы мектеп» пилоттық ұлттық жобасымен қоса мемлекеттік әріптестік аясында жеке инвесторлардың мектеп салуына мүмкіндік жасап отырмыз. Осы ретте өткен жылы Еңбекшіқазақ ауданында 1500 орынға арналған жекеменшік «ALTYN ADAM» инновациялық мектебі ашылды. Біз білім сапасын арттыруға бағытталған игі жобаларға қашанда қолдау көрсетеміз. Білім сапасын арттыруға, оқу бағдарламаларындағы кемшіліктерді түзетуге, мұғалімдердің біліктілігін арттыруға, кәсіби өсуіне мейлінше жағдай жасалуда, – деді Гүлсара Тастандықызы.
Ермұрат МҰҚЫРБАЙ
