Аудан орталығы Бақанаста екі қабатты 4 пәтерлі 6 тұрғын үйдің құрылыс жұмысы қарқынды жүріп жатыр.
Қазан айында іргетасы қаланған тұрғын үйлердің құрылысын жүргізуді «BC Lengthy life» ЖШС өз жауапкершілігіне алған. Құрылыс барысымен танысуға барғанымызда серіктестік директоры Жеңіс Қасымбек, бас инженер Әлішер Қасымбеков және прораб Лю Хы Чан тұрғын үйлердің сызбасына қарап, өзара жұмыс жүйесін жоспарлап тұр екен.
Атқан таңмен таласа тұрып, кеш қарайып батқанша тынымсыз жұмыс жасап, еңбектің қара қазанын қайнатып жатқан инвесторлардың айтуынша, тұрғын үйлердің іргетасы қаланған күннен бастап, қоңыр күздің қолайсыз ауа райына қарамастан бар күш-жігерлерін салып, жұмыс қарқынын бір сәтке де толастатпаған. Олардың алға қойған мақсаты – 20 желтоқсан күні құрылыс жұмысын толыққанды аяқтау.
Әңгіме барысында «BC Lengthy life» ЖШС-ның директоры Жеңіс Рахымберліұлы тұрғын үйдің әрқайсында жеке аула болатынын, табиғи газға қосылған жылыту қазандығы орнатылатынын, сонымен қатар электр жарығын, ауыз су құбырын, кәріз жүйесін жүргізу жұмыстары да бірге атқарылып жатқанын айтты. Бүгінгі таңда 6 тұрғын үйдің кірпіш қалау жұмысының 70 пайызы, бетон құю ісінің 90 пайызы және темірлерді торлау жұмысының 85 пайызы орындалғанын атап өтті. Сонымен қатар ол кірпіш қалау аяқталған бетте тұрғын үйлердің төбесін жауып, шатырын орнату, сыртын қаптау, іші-сыртын сылау, есік-терезелерін орнату, әктеу, сырлау жұмыстары өз кезеңімен жасалынатынын және құрылыс заттары жеткілікті екенін сөз етті.
Инвесторлар ауа райы қолайлы болса, 20 желтоқсанда тұрғын үйлердің құрылысын толыққанды аяқтап, аудан әкімдігіне табыстайтындарына кәміл сенімді. Жаңа үлгіде салынып жатқан тұрғын үйлердің құрылысы дер уақытында аяқталса, үй кезегінде тұрған 24 отбасы баспаналы болып, қоныстойын тойлап, аудан тұрғындары бір қуанып қалар еді. Бұйырса, ол қуанышты сәтті көрер күн де алыс емес.
Құрылыста жұмыс істеп жүрген 47 адамның 12-сі аудан тұрғыны екен. Еден құю жұмысын өз міндеттеріне алған Бақанас ауылының тұрғындары Нұрсұлтан Серік, Дияр Үсенбаев, Еламан Серік сынды азаматтар тұрғын үйлердің сапалы болуына баса мән беріп, бар өнерін салып жұмыс істеп жатқандарын жасырмады. Кез келген тұрғын үйдің сапалы салынуы сол жерде еңбек етіп жүрген құрышқолды құрылысшыларға тікелей байланысты. Егер олар «Бұл баспанада біз тұрмаймыз ғой» деп өз міндеттеріне атүсті қараса, ол үйдің сәні мен сәулеті жараспасы анық.
Бақтығали ДӘУІТБАЕВ
Балқаш ауданы
