Өткен сенбіде облыс әкімі Марат Сұлтанғазиев шұғыл түрде Алатау қаласына қарасты Заречный ауылындағы жаңадан салынып жатқан алюминний профиль “LH AL” серіктестігіне барды. Аталған құрылыста бірқатар техникалық заңбұзушылықтар анықталып, құрылыс жұмысы уақытша тоқтатылды.
Аймақ басшысының айтуынша, Алатау қаласындағы құрылыс алаңында бірқатар заңбұзушылық орын алған. Тексеру барысында мердігер ұйымның жоба бекітілмей, мемлекеттік сараптамадан өтпей жатып бұрғылау жұмыстарын бастап кеткені мәлім болды. Сондай-ақ құрылыс авторлық және техникалық қадағалаусыз, уәкілетті органдарға ресми хабарланбастан жүргізілген. Осыған байланысты облыс әкімі нысандағы құрылыс жұмысын тоқтату туралы тапсырма берді.
«Анықталған заңбұзушылықтарға жүйелі түрде әрекет ету қажет. Барлық жұмыс қолданыстағы заңнама аясында, қауіпсіздік және экологиялық талаптарды сақтай отырып жүргізілуі тиіс», – деді Марат Сұлтанғазиев.
Сонымен қатар бұрғылау кезінде жер асты суының өте көп мөлшерде шығуы және ұңғыма ауызының ішінара опырылып құлауы тіркелген. Зардаптарды жою жұмысы да жүргізілмеген. Экология департаменті қоршаған ортаға ықтимал әсерді бағалап, техникалық апаттың алдын алу бойынша жұмысты тоқтатуға шешім шығарды.
Қалалық төтенше жағдайлар департаментіне де қауіп-қатердің алдын алу үшін тұрақты бақылау жүргізу тапсырылды. Ал мердігер ұйымға анықталған заңбұзушылықтарды жою бойынша белгіленген мерзім мен ресми нұсқама берілді.
Еске сала кетер болсақ, өткен жылдың қаңтар айында Президентіміз Қасым-Жомарт Тоқаев Алматы облысының әкімшілік-аумақтық құрылымына өзгерістер енгізу туралы жарлыққа қол қойған болатын. Нәтижесінде жаңа Алатау қаласы құрылды. Оның құрамына 12 елдімекен кіріп, олар шағынаудандарға айналды. Қала Сингапур стилінде салынатын болды. Мемлекет басшысы қала құрылысын облыс әкімімен талқылап, түрлі инвестициялық жобалар тартылатынын мәлім еткен болатын.
Бағдат ШОЙБАС
Алатау қаласы
