Облыстық білім басқармасы Алматы қаласындағы №1 Балалар үйінің ғимараты апатты жағдайда болуына байланысты ондағы тәрбиеленушілерді Қонаев қаласында салынған жаңа мекемеге көшіру туралы шешім қабылдаған болатын. Бірақ ондағы тәрбиеленушілер Қонаевқа көшкілері келмейтінін айтып, наразылық білдірген. Осыған орай мәселенің мән-жайын түсіндіру мақсатында баспасөз туры ұйымдастырылып, жаңа ғимарат таныстырылды.
Қонаевтағы жеке инвестор есебінен салынған жаңа Балалар үйі 180 балаға арналған. Мұнда кіші және ересек топтарға арналған бөлек асханалар, жеке спорт және мәжіліс залдары, кең ойын алаңы, демалыс аймақтары, кітапхана, медициналық ем қабылдау бөлмелері қарастырылған. Сондай-ақ балалардың шығармашылық дамуына арналған еңбекке баулу, музыка, шаштараз, аспаздыққа үйрететін кабинеттер де бар. Қазіргі заманғы санитариялық, құрылыс және білім беру стандарттарына толық сәйкес келеді.
– Жаңа ғимарат әкімдіктің 2025 жылғы 9 шілдедегі қаулысына сәйкес Алматы облыстық білім басқармасының балансына өтті. Балалар үйі Алматы қаласында орналасқанымен, заңды тұрғыда Алматы облысына қарайды. Сондықтан тәрбиеленушілерді үй кезегіне тіркеу, медициналық ем қабылдау кезінде қиындықтар болды. Балалар Қонаев қаласына көшірілгеннен кейін бұл мәселелер шешімін табады. Қазіргі кезде балалар мен қызметкерлерге ақпараттық түсіндіру жұмыстары жүргізілуде. Жаңа ғимаратта балаларға барлық жағдай жасалған. Заманауи жабдықтармен қамтылып, білім алуына, қауіпсіздігі мен шығармашылық дамуына да баса назар аударылған. Балалар жақын маңдағы мектептерде білім алатын болады және оларды тасымалдауға арналған автобус та қарастырылған, – деді облыстық білім басқармасы басшысының орынбасары Ақмарал Әтенбекова.
Балаларды көшіру кезең-кезеңімен жүргізіледі. Алғашқы кезеңде 1-4- сыныпта оқитын 44 бала көшіріледі, ал жоғары сынып тәрбиеленушілері әлеуметтік бейімделуді сақтау мақсатында біртіндеп, тамыз айының соңына дейін көшірілетін болады. Қазіргі уақытта мекемеде 171 бала тербиеленуде. Олардың 125-і – жетім балалар, 42-сі – өмірлік қиын жағдайға тап болғандар. 85 қызметкер еңбек етеді.
Журналистер қауымы Алматы қаласындағы Балалар үйі ғимаратының жай-күйімен де танысты. Балаларды қолдау орталығының директоры Роза Жақанқызының айтуынша, бұл ғимарат 1963 жылы салынған. 2024 жылы «Астанақұрылыссервис» ЖШС жүргізген техникалық зерттеу кезінде нысандағы инженерлік желілердің – жылу және сумен қамту жүйелерінің тозғаны және қалпына келтіруге жарамсыз екені, санитариялық, өрт қауіпсіздігі және құрылыс нормаларына сай келмейтіні анықталып, жер сілкінісі кезінде қабырғаларда жарықтар пайда болған. Ғимараттағы бір бөлме асхана және мәжіліс залы ретінде пайдаланылған.
Балалар үйінің бітіруші түлектері Алматы қаласындағы ғимаратта балалық шағы өткенін, ол жерді қимайтынын айтты. Ал балалар үйінің директоры қауіпсіздік өте маңызды екенін, сондықтан оларды ескі ғимаратта қалдыра алмайтынын, жаңа мекемеде сапалы әрі жайлы жағдай жасалғанын жеткізді.
Гүлзат БАЙҚОНЫСОВА
