Алатау қаласында Ұлыстың ұлы күні – Наурыз мерекесіне орай ауқымды мерекелік іс-шаралар ұйымдастырылды. Биылғы Наурыз ерекше мазмұнымен, тағылымы терең мәнімен және көпұлтты бірлікті айшықтаған көріністерімен ерекшеленді.
Мерекеге орай қала әкімі тұрғындарды құттықтап, бұл күннің береке-бірлік пен ізгіліктің бастауы екенін атап өтті.
«Баршаңызды береке-бірліктің бастауы, ізгілік пен жақсылықтың жаршысы – Ұлыстың ұлы күні Наурыз мерекесімен шын жүректен құттықтаймын! Бүгін – ақ дастархан жайылып, алыстағы ағайынмен қауышатын, бірлік пен ынтымақ нығайып, тіршілігіміз түлеп, жаңаратын ерекше күн», – делінген құттықтауда.
Қала басшысы өз сөзінде биылғы Наурыздың ерекшеліктеріне де тоқталды. Атап айтқанда, мереке елімізде «Наурызнама» онкүндігі аясында жаңа сипат алып, жалпыұлттық деңгейде аталып өтуде. Сонымен қатар, биылғы Наурыз Ораза айт мерекесімен тұспа-тұс келіп, рухани құндылықтарды дәріптейтін ерекше кезеңге айналды.
Сондай-ақ, Алатау қаласының дамуына қатысты маңызды жаңалықтар да атап өтілді. Жақында Астанада Парламент палаталарының бірлескен отырысында «Алатау қаласының ерекше мәртебесі туралы Конституциялық заң» жобасы қаралғаны белгілі. Бұл құжат қаланың дамуына жаңа серпін беріп, инвестиция тартуға, инфрақұрылымды жетілдіруге және тұрғындардың өмір сапасын арттыруға мүмкіндік ашпақ.
Бүгінде Алатау қаласы – 30-дан астам этнос өкілдері тату-тәтті өмір сүріп жатқан берекелі мекен. Қаладағы этномәдени бірлестіктер қоғамдық келісімді нығайтып, достық пен өзара құрметтің үлгісін көрсетіп келеді.
Мерекелік іс-шаралар аясында қалада қазақстандық эстрада жұлдыздарының қатысуымен үлкен концерт ұйымдастырылып, тұрғындар мен қонақтарға көтеріңкі көңіл-күй сыйлады. Сонымен қатар, қала аумағында 16 қазақ үй тігіліп, олардың әрқайсысында түрлі этнос өкілдері бірлесе отырып наурыз көже дайындады. Бұл бастама ұлттық тағам арқылы халықтың бірлігі мен ортақ құндылықтарын айшықтай түсті.
Сондай-ақ, мерекеде ұлттық ойындар ойнатылып, дәстүрлі салт-дәстүрлер кеңінен насихатталды. Қаламыздың ақсақалы көпшілікке бата беріп, елге береке, ынтымақ пен амандық тіледі. Қатысушылар қазақ халқының бай мәдени мұрасымен танысып, мерекелік думанның көркін қыздырды.
Алатауда өткен Наурыз мерекесі достық пен ынтымақтың, бірлік пен татулықтың жарқын көрінісіне айналды.
