10 тамыз – Қазақстанда Абай күні. Ойшыл, ақын Абай Құнанбайұлының туғанына биыл 173 жыл толды. Қазақстанның мерекелік күнтізбесіне бұл күн 2020 жылы Абайдың туғанына 175 жыл толуына орай үкімет қаулысымен енгізілген.
Абай күні ресми мереке саналмаса да, Абайды құрметтейтін әр азамат, қаламгерлер, мәдениет, өнер адамдары бұл күні Абайдың нақыл сөздері, өлеңдері мен шығармаларынан үзінді оқып, әлеуметтік желілерде бөлісіп, насихаттайды.
Ойшылдың дүниеге келген күніне орай бүгін Қазақстан Президенті Қасым-Жомарт Тоқаев та Twitter-дегі парақшасында құттықтау жариялады.
«Баршаңызды Абай күнімен құттықтаймын! Хакім Абай – ұлт руханиятын дамытуға өлшеусіз үлес қосқан кемеңгер. Ұлағатты ұрпақ тәрбиелеу ісінде Абай өсиетінің маңызы зор. Адал азамат ұғымы ұлы ақынның «толық адам» тұжырымынан бастау алады. Біз Абай мұрасын насихаттауды жалғастыра береміз», – деп жазды Мемлекет басшысы.
