Талғар ауданының Қайнар ауылдық округіне қарасты Дәулет ауылынан 26 қарашадан бастап Алматы қаласына №216 автобус жүре бастады. Жаңа маршрутта барлығы бес автобус әр 45 минут сайын жүреді.
Таяуда Талғар ауданының Тұздыбастау ауылынан да Алматы-2 теміржол вокзалына қатынайтын жаңа автобус бағыты ашылған.
Еске сала кетейік, Алматы агломерациясын дамыту аясында 2023 жылы 25 елді мекенді қамтитын қала маңына қатынайтын жаңа 10 маршрут ұйымдастыру көзделген. Бұған дейін 8 маршрут ашылды, қалған екі бағыт әзірленіп жатыр.
Бұған қоса, Алматы және Алматы агломерациясын дамыту жоспарына сәйкес, 2024 жылдың соңына дейін 20 жаңа қала маңы маршрутын ұйымдастыру жоспарға енген, бұл 50 елді мекенді қамтамасыз етеді.
