Жамбыл ауданына қарасты Үлкен ауылындағы №322 сайлау учаскесінде дауыс беру үшін 150 адам кезекте тұр. Атом электр стансасы салынғалы жатқан ауылдың тұрғындары референдумның өздері тұрып жатқан елдімекен үшін үлкен маңызға ие екенін түйсініп, тарихи сәтке үлкен жауапкершілікпен қарауда.
Таң азанымен ауыл халқы соңғы жаңалықтарды талқылап, өз ойларын ортаға сала бастады. Солардың бірі жеке кәсіпкер – Рахима Каирбекова.
– Бүгінгі референдумның маңызы зор. Өйткені бұл – елдің болашағына қатысты шешімдерді халықтың өзі қабылдайтын сәт. Әрбір дауыс берушінің таңдауы маңызды. Біз өз таңдауымыз арқылы мемлекетіміздің дамуына ықпал етеміз. Бүгінгі референдумға қатысуға өзімнің азаматтық борышым түрткі болды. Халықтың таңдауын елемеу дұрыс емес деп ойлаймын. Өз болашағымызға немқұрайлы қарамауға болмайды, – деді ол.
Зейнеткер, инженер-механик, Үлкен ауылының тұрғыны Сергей Третьяков: «Мен үшін референдумға қатысу – еліміздің болашағына тікелей әсер ету мүмкіндігі. Бұл – әрқайсымыздың маңызды шешімге қатысты өз пікірімізді білдіретін сәт және өз құқығымды пайдаланып, дауыс бере алғаныма қуаныштымын. Өзгерістерді қаласақ, мүдделеріміз ескерілсін десек, осындай шараларға қатысуымыз керек. Маңызды мәселеде шет қалуға болмайды, – деп өз ойын білдірді.
Тігін және тоқу жабдықтары бойынша инженер-механик, зейнеткер Татьяна Ветрова да пікірін ортаға салды. «Мен үшін бүгін ең маңыздысы – референдумға қатысу. Мен өзімнің жеке ұстанымымды білдіргім келеді, бұл мүмкіндікті берген Президенімізге алғысым шексіз. Біз өз еліміздің болашағын өзгертеміз, – деді ол.
