Алматы облысының тілдерді дамыту жөніндегі басқармасына қарасты «Тіл» оқу-әдістемелік орталығының аудандық, ауылдық-округтік филиалдарының жылдық жұмысын қорытындылау мақсатында « Оқыту орталықтарының жұмысын жүйелендіру» атты облыстық байқауының марапаттау рәсімі өтті.
Алматы облысының «Тіл» оқу-әдістемелік орталығы облыстағы ересек тұрғындарға мемлекеттік, ағылшын және орыс тіліндерін меңгеруге жағдай жасайды. Облыс аумағында аталмыш орталықтың 10 аудандық, ауылдық-округтік филиалдарында тіл үйренушілерге курс ұйымдастырады.
Филиалдардың жұмысын қорытындылау және ынталандыру мақсатында байқау ұйымдастырылып, үздіктер ақшалай сыйлық және дипломмен марапатталды. Атап айтсақ, «Креативті оқытушы» номинациясы бойынша Алматы облысының “Тіл” оқу-әдістемелік орталығының Қарасай аудандық филиалының оқытушысы Іңкәр Нұрсапақызы Манапқан жеңімпаз атанды. «Үздік меңгеруші» атағына Жамбыл аудандық филиалының меңгерушісі Әйгерім Дәуітбекқызы Әбу лайық деп танылды. «Үздік ұжым» атағы Ұйғыр аудандық филиалының ұжымына берілді.
Сонымен қатар, 2024 жылы 2600 тіл үйренуші мемлекеттік тіл курсын аяқтап, оның ішінде 1093 этнос өкілі қазақ тілін меңгерді. Белсенділігімен ерекшеленген тіл үйренушілер алғыс хаттармен марапатталды.
Үздіктерді марапаттау сәтінде Алматы облысының тілдерді дамыту жөніндегі басқармасының басшысы Данияр Ахметов: «Бұл байқау оқыту орталықтарының жұмысына жаңа серпін беріп, олардың сапалы қызмет көрсетуіне ықпал етеді. Осындай іс-шаралар облыста тіл саясатын дамытудағы маңызды қадамдардың бірі» деп есептейтінін атап өтті.
Марапаттау рәсімі «Талғар аудандық Мәдениет үйі» әншілерінің концерттік бағдарламасына ұласып, шараға қатысушылар өзара пікір алмасты. Алдағы уақытта байқау жыл сайынғы дәстүрге айналып, оқыту орталықтарының өзара тәжірибе алмасу алаңына айналмақ.
Ақжарқын Бейбітқызы,
Алматы облысының «Тіл» оқу-әдістемелік орталығы
Тілдерді оқыту, талдау, мониторинг бөлімінің басшысы
