Алматы облысында орналасқан жалғыз жоғары оқу орны – Сулейман Демирел университеті маңызды форумдар, дөңгелек үстелдер мен пікірталастар өткізілетін орынға айналған. Осы жолы мұнда Қарасай ауданындағы студент жастар үшін нашақорлыққа қарсы күрес мәселелері бойынша семинар-тренинг өткізілді. Осы іс-шара аясында «Таңдау сенде» тақырыбында интеллектуалдық ойындар, сұрақ-жауаптар мен пікірталастар ұйымдастырылды.
Аталмыш басқосуды облыстық полиция департаменті, аудандық полиция басқармасы, облыстық жастар саясаты басқармасы және аудандық жастар ресурстық орталығы ұйымдастарған еді. Семинарда нашақорлықтың зияны туралы Қарасай аудандық клиникалық көпсалалы орталық ауруханасының нарколог-дәрігері Айша Ақшалова жастарға қарапайым тілмен айтып берді. Аудандық жастар ресурстық орталығының психологы Сәуле Сұлтанғалиева нашақорлықтың алдын алу мәселесіне ерекше тоқталып, жасөспірімдер арасында интеллектуалды ойын өткізді.
Құқық қорғау органдарының өкілдері де жұмыс барысында нашақорлықпен бетпе-бет келетін маман ретінде бұл мәселенің өзектілігіне жастардың назарын аударды. Олар нашақорлардың, сондай-ақ есірткі өндіріп, сатумен айналысатын адамдардың тағдыры қайғылы аяқталатыны жайлы баяндады. Осы орайда нашақорлыққа қарсы облыстық басқарманың бастығы, полиция подполковнигі Ардақ Қайсаров пен Қарасай аудандық полиция басқармасының бастығы, полиция майоры Елзат Қанатұлы өздерінің тәжірибелерімен бөлісті. Олар жастарды өлкеміздегі есірткіге қатысты қылмыстар туралы жалпы статистикамен таныстырып, жиынға қатусушылар мен олардың жақындарын бұл жамандықтан аулақ болуға шақырды.
Семинар-тренинг соңында құқық қорғау органдарының өкілдері қатысушыларға естелік сыйлықтар табыс етті. Бұдан бөлек, шара барысында нашақорлықтың алдын алу сипатындағы брошюралар таратылды.
– Кәсіби мамандардың қатысуымен өткен бұл семинар-тренинг жастарға ерекше әсер етті деп сенемін, – деді өз сөзінде Қарасай аудандық жастар ресурстық орталығының жетекшісі Жарқынай Садуова. – Барлық ақпарат қолжетімді түрде, өмірлік жағдайларды нақтылы көрсету арқылы ұсынылды. Жастар айтылғандардың бәрін ескеріп, тиісті қорытынды шығарып, өмірде қателікке бой алдырмайтыңдай дұрыс таңдау жасайды деп үміттенеміз.
Қуат Қайранбаев,
Қарасай ауданы
