Ерте көктемнен кетпен-күректерін қолға алып, егіс алқаптарына егін егуге шыққан диқандардың алажаздай төккен терінің өтелер шағы келді. Өйткені олар арпа-бидай ору жұмысын бастап, дала төсін дүбірге бөлеп, жұмыс қарқынын күннен-күнге күшейтуде.
Жалпы Балқаш ауданы көлемінде биыл 29380 гектар суармалы жерге егін егілген болса, оның 6698 гектарына күріш, 6131 гектар жерге арпа-бидай, қалған егістік алқабында көпжылдық шөп өсіріледі. Бүгінгі таңда аудан диқандары арпа-бидай егілген егістік алқабының 3300 гектарын бастырып үлгерген. Ауылшаруашылық саласы мамандарының болжамына сүйенсек, олар егістік алқаптың әр гектарынан 18 центнерден өнім алуды жоспарлап отыр. Егін ору жұмысы аудан әкімінің тікелей назарында тұрғандықтан, осы салаға жауапты мамандар егіс алқабын жіті бақылауға алған.
Ерте тұрып, кеш жатып, күні бойы дала төсінде жүрген диқандардың жай-күйін көзбен көру мақсатында Балқаш ауданы әкімінің орынбасары Марлан Жолдахмет пен ауыл шаруашылығы бөлімінің басшысы Дархан Төлеубек өңіріміздегі алдыңғы қатарлы шаруашылықтардың бірі – «Агрофирма Бірлік» жауапкершілігі шектеулі серіктестігіне арнайы барып қайтты. Біз атбасын бұрған шаруашылық директорының орынбасары Аршын Жақыпов пен бас гидротехнигі Әлімжан Ахметовті және механизатор Алмас Амангелдіні егіс алқабында жүрген жерінде жолықтырдық. Егін орағына жауапты мамандардың айтуынша, 1360 гектар суармалы жерге егілген бидайдың бүгінгі таңда 527 гектары бастырылған. Әзірше әр гектарынан 26,6 центнерден өнім алынуда. Бұл жауапты науқанға шаруашылық бойынша тоғыз «Енисей – 1200», үш «ҮТО» комбайны және он екі «МТЗ – 1221», екі «ҮТО» тіркемелі тракторы жұмылдырылған.
Сапар барысында Марлан Халдиханұлы «Агрофирма Бірлік» ЖШС директорының орынбасарына мол өнім алу жайында бірқатар сұрақ қойып, қандай тыңайтқыш қолданылғанын сұрады. Егін егудің қыр-сырын жіті меңгерген маман ерте көктемнен басталған жұмыс жүйесін жіпке тізгендей баяндап, «Ең бастысы ауыспалы егіс алқабының ережесі сақталса, құнарлы топыраққа сіңірілген дәнді-дақыл мол өнім береді» деген өмірлік тәжірибесімен бөлісті.
«Диқан жерін анасындай сүйеді, жер диқанға баласындай иеді» дегендей, Жер-Ананы қадір тұтқан қауымының атқарып жатқан бүгінгі ісі жемісті болып, алажаздай балаша баптаған алтын астығы мол өнім береріне сенім мол.
Бақтығали ДӘУІТБАЕВ
Балқаш ауданы
