Алатау қаласындағы 53975 әскери бөлімнің құрылғанына 82 жыл толуына орай Ашық есік күні ұйымдастырылды. Шараға Отан алдындағы борышын өтеп жүрген сарбаздардың ата-аналары, қала тұрғындары, жергілікті билік өкілдері, әскери қызметшілер, Ауған соғысының ардагерлері қатысты.
Ашық есік күні Ауған соғысы жауынгерлеріне арналған ескерткіш пен әскери техникалар мұражайы ашылды. Жиналғандар ескерткішке гүл шоқтарын қойып, ерлікпен қаза тапқан есіл ерлерді еске алды. 53975 әскери бөлімінің командирі, полковник Нұрлан Байдуллаев аталған шараның маңызына тоқталып, жас ұрпақ өткен тарихын ұмытпай, ержүрек батыр аталарымен мақтанып, отаншылдық рухта тәрбиеленуі керектігін айтты.
Аталған шарада қонақтар әскери бөлім қызметімен жан-жақты танысты. Сарбаздар жиналғандарға жауынгерлік өнерін паш етті. Сол арқылы жасөспірімдердің әскери қызметке деген қызығушылығын оятты. Олар өздерін қызықтырған сұрақтарына жауап алып, бұл мамандықтың маңызды әрі жауапты екенін түсінді.
Қонақтар әскери қызметшілердің еңбегіне жоғары баға берді. Шара соңында Арна ауылдық Мәдениет үйінің өнерпаздары әуелете ән салып, көпшілікке көтеріңкі көңіл-күй сыйлады.
Бағдат Шойбасов
Іле ауданы
