Александр Асанов атындағы ату клубында стенд атудан және компакт-спортингтен Азия кубогы басталды. Аталған спорттық дода елімізде алғаш рет жалауын желбіретіп отыр.
«Біздің мақсатымыз – Қазақстанда әлемдегі лицензиялық кубокты қабылдау. Бүгін, міне, стенд атудан Азия кубогын Қазақстанда өткізуге мүмкіндік туып отыр. Бұл біздің құраманың дайындығын арттырып, жеңіске жетуіне септеседі деп сенеміз», – деді ҚР Спорттық ату федерациясының бас хатшысы Олег Почивалов.
Жарыстың басты мақсаты – ату спортының танымалдығын арттыру, спортшылардың шеберлігін шыңдау, рейтингін анықтау, жаттықтырушылар мен төрешілердің кәсіби біліктілігін көтеру.
20-30 қыркүйек аралығында өтетін жарысқа құрлықтағы 20 елден таңдаулы 300-ден астам спортшы қатысуда. Бұл қатарда Қазақстан, Бахрейн, Үндістан, Иордания, Иран, Катар, Қытай, Сауд Арабиясы Корольдігі, Кувейт, Қырғызстан, Ливан, Біріккен Араб Әмірліктері, Өзбекстан, Жапония спортшылары бар.
Жарыстың ресми ашылу салтанатында сөз сөйлеген облыс әкімі Марат Сұлтанғазиев: «Құрметті спортшылар және спортсүйер қауым, Алматы облысында бастау алған стенд атудан Азия кубогына қош келдіңіздер! Мемлекет басшысы Қасым-Жомарт Тоқаев халыққа Жолдауында жастар мен азаматтар арасында бұқаралық спортты дамытуға жағдай жасауды тапсырған болатын. Бұқаралық спортты дамыту – мемлекетіміздің стратегиялық бағыттарының бірі және ел имиджінің көрсеткіші. Бүгінгі өткізіліп отырған жарысымыз болашақта үлкен дәрежедегі спортшыларымызды дайындап шығаруға септігін тигізеді деп сенемін. Азия кубогы – біз үшін еліміздегі елеулі оқиға және үлкен мәртебе. Бүгінгі жарыста әлем елдерінен спортшылар қатысып отыр. Стенд ату – мергендікті, батылдықты, төзімділікті талап ететін ерекше спорт түрі. Қатысушыларға табыс пен жеңіс тілеймін», – деді.
Айта кетейік, кейінгі жылдары Қазақстан спорттың осы түрінен бірқатар халықаралық жарысты жоғары деңгейде ұйымдастырып келеді. Соның бірегейі – осы стенд атудан өтіп жатқан Алматы облысындағы рейтингтік әлем кубогы. Сонымен қатар 21-24 қыркүйек аралығында компакт-спортингтен ашық Азия кубогы өтті. Онда әлемнің 10 елінен 100-ден астам спортшы бақ сынады.
Бағдат ШОЙБАС
Іле ауданы
