Бұрнағы күні әл-Фараби атындағы Қазақ ұлттық университетінде Әзербайжан Республикасының үшінші Президенті Гейдар Әлиевтің туғанына 100 жыл толуына арналған «Әзербайжан – Қазақстан қатынастары: кеше, бүгін, ертең» тақырыбында халықаралық конференция өтті.
Осы тақырыпта Әзербайжан Республикасы Ұлттық Мәжілісі Мәдениет комитетінің төрағасы, Әзербайжан – Қазақстан парламентаралық байланыстары жөніндегі жұмыс тобының мүшесі, профессор Ганире Әлескерқызы Пашаева зиялы қауым мен студенттер алдында көшбасшылық дәріс оқыды. Филология ғылымдарының докторы, профессор Нұрсұлу Шаймерденова «Гейдар Әлиев және түркі әлемі», әл-Фараби атындағы ҚазҰУ-дың PhD докторы Ілияс Нұрат «Қазақстан – Әзербайжан дипломатиялық қатынастары» тақырыбында баяндамалар жасады.
Сондай-ақ, конференция аясында әзербайжан әдебиетінің классигі, көрнекті ғалым-ұстаз Мір Жәлел Пашаевтың 115 жылдығына орай қазақ тілінде жарық көрген «Таулардың жүрегі» кітабының тұсаукесері ұйымдастырылды. Тұсаукесер рәсімінде университет басшысы Жансейіт Түймебаев Мір Жәлел Пашаевтың шығармашылық жолына тоқталып, «Қазақ университеті» баспасынан жарық көрген еңбекке атсалысқан аудармашылар Нұрғали Оразға, Нұржан Қуантайұлына, Саят Қамшыгерге, Күннұр Айтбаеваға және жинақтың жауапты редакторы Кәдірбек Құныпияұлына арнайы алғысын білдірді. Тағылымды шараға шетелдік ғалымдар, Әзербайжаннан келген делегация, оқу ордасының оқытушыпрофессорлар құрамы қатысты.
