Алматы облысында Президент Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауы «BIR TOLQYNDA» ашық диалог алаңы форматында талқыланды. Іс-шараны «AMANAT» партиясы жанындағы «Жастар Рухы» жастар қанатының облыстық филиалы ұйымдастырды.
Кездесуге студенттер, жас кәсіпкерлер, волонтерлер, инфлюенсерлер және сарапшылар қатысты. Диалог барысында Жолдауда көтерілген негізгі бастамалар – жасанды интеллект, инновациялық стартаптар, жастар кәсіпкерлігін қолдау және білім беруді цифрландыру мәселелері қаралды.
Alatau Hub директоры Бексұлтан Нұрақын облыста іске асырылып жатқан жобалар туралы баяндады. Оның айтуынша, Алматы облысы республикада алғашқылардың бірі болып мемлекеттік қызметкерлерге жасанды интеллект құралдарын үйретуді бастаған. 500-ден астам қызметкер ChatGPT, Claude, Copilot, Midjourney және Sora платформаларын меңгерген. Сонымен қатар, өңірде 9 425 бейнабақылау камерасы жасанды интеллект функцияларымен жұмыс істейді, мектептер мен балабақшаларға Face ID және QR-код жүйелері енгізілген.
«Жастар жасанды интеллектті тек тұтынушы ретінде емес, жаңа шешімдердің авторы ретінде меңгеруі тиіс. Біз оларға no-code курстар, хакатондар және акселерация бағдарламалары арқылы мүмкіндік беріп отырмыз», – деді Бексұлтан Нұрақын.
Диалог соңында қатысушылар ауыл жастары үшін тегін IT курстарын көбейту, оқу процесінде жасанды интеллект құралдарын қолдану және жастар кәсіпкерлігін қаржыландыруды кеңейту бойынша ұсыныстар айтты.
