Ұлттық құрылтайдың V отырысында Мемлекет басшысы Қасым-Жомарт Тоқаев елімізде мемлекеттік кеңесші лауазымы жойылатынын айтып, вице-президент лауазымын бекітуді ұсынды.
— Жұмыс істеп тұрған Парламенттің қызметін қамтамасыз ететін аппараттық құрылымның бір бөлігі, сонымен қатар Мемлекеттік кеңесші лауазымы таратылуға жатады. Президент әкімшілігінің фукционалы, құрылысы және оны басқару жүйесі іс жүзіндегі қажеттілікке орай реформаланады. Әрине, бірқатар елде вице-президент лауазымы бар екені сіздерге белгілі. Біздің жағдайда аталған лауазымды бекіту мемлекетті басқару процесін тұрақтандырады. Сонымен қатар билік тармағына қатысты түпкілікті нақтылық енгізеді, — деді Президент.
Мемлекет басшысының айтуынша, аталған конституциялық жаңашылдық президентті билік институтының әлсіреуін білдірмейді. Керісінше, Президент лауазымы мемлекеттік жүйедегі ең бастысы болып қалады.
— Қазақстан президентті республика ретінде табысты дамитындығына сенімдімін. Мұның үстіне халықаралық тәжірибе мұндай таңдаудың пайдасын сенімді түрде дәлелдеп отыр. Мен ұсынған мемлекеттік биліктегі реформалар, оның ішінде бірпалаталы парламентке — Құрылтайға өту, Халық кеңесін құру, вице-президент лауазымын енгізу еліміздің дамуына тың серпін беріп, оның әлеуетін күшейтетіндігіне сенімдімін, — деді Мемлекет басшысы.
— Вице-президентті Парламенттің қарапайым басым дауысының келісімімен Президент тағайындайды. Оның өкілеттік аясын Мемлекет басшысының өзі айқындайды. Вице-президент Президенттің тапсырмасымен халықаралық форумдар мен шет мемлекеттердің делегацияларымен келіссөздерде Қазақстан Республикасының мүддесін, Парламентте Президенттің мүдделерін білдіретіні, отандық және шетелдік қоғамдық-саяси, ғылыми, мәдени-ағартушылық ұйымдармен өзара іс-қимыл жасайтыны, Президенттің өзге де тапсырмаларын орындайтыны көзделеді. Вице-президенттің қызметтік функционалына қатысты осы негізгі ережелерді Конституция мәтінінде де көрсеткен жөн, — деді Президент.
Осыған дейін Мемлекет басшысы жаңа Парламент 5 жылға сайланатыны туралы айтты.
